गुल्मीको पर्यटकीय एवम् धार्मिक स्थल रुरु क्षेत्रको सम्रग विकासको डिपिआर तयार गर्नको लागी केन्द्र सरकारबाट दुई करोड रकम विनियोजन गरिएको छ ।
शनिवार केन्द्रीय विज्ञ टोली, ५ नम्बर प्रदेशका विशेषाधिकार सभापति कमलराज श्रेष्ठ, सत्यवती गाउँपालिकाका अध्यक्ष पारिश्वर ढकाल, रुरु गाउँपालिकाका अध्यक्ष निलकण्ठ गौतम, स्थानीय समाजसेवीहरू बिच यस क्षेत्रको विकास तथा डिपिआरको बारेमा छलफल समेत भएको थियो ।
सत्यवती गाउँपालिकाका अध्यक्ष पारिश्वर ढकालले भने “यो डिपिआरले केही आशा पलाएको छ” । रुद्रवेणी क्षेत्रका पूर्वाधार, तटवन्धन रुद्रवेणी वुदाआश्रम तथा अन्य स्थलको मुहार फेरिनेमा आफू आशावादी रहेको उनले बताए ।
कालिगण्डकीको किनारामा अवस्थित रुरु क्षेत्रको महिमा पुराण तथा शास्त्रहरूमा उल्लेख गरेको पाइन्छ । बराह पुराणमा रुरु क्षेत्रको पौराणिक इतिहासको वर्णन गरिएको छ भने स्वस्थानी किताबमा पनि यसै स्थानमा सतीदेवीको दन्त पतन भएको उल्लेख गरिएको छ । त्यस्तै हिन्दु धार्मिक मान्यता अनुसार नेपालमा चार वटा धार्मिक क्षेत्रहरू मध्येको एक क्षेत्र रुरु क्षेत्र पनि हो ।
यस ठाउँलाई नेपालको बनारसको रूपमा पनि चिन्ने गरिन्छ । यो क्षेत्र धार्मिक स्थल मात्र नभएर यो भेगको मुख्य व्यापारिक केन्द्रबिन्दु पनि हो । रुरु प्राचिनकाल देखी नै गुल्मी, पाल्पा, स्याङ्जा, अर्घाखाँची, बागलुङ, रुकुम र रोल्पा लगायत अन्य आसपासका जनताहरूको व्यापारिक केन्द्रबिन्दु समेत रहेको थियो ।
खड्का सल्लेरी खबरका लुम्बिनी प्रदेश सम्बाददाता हुन् ।