मिलन लोहनी
नेपाली सिनेमा जगतमा प्रयोगात्मक या भनौं अलग धारको फिल्म बन्न कुनै पनि निर्माता वा निर्देशकले नजाने कति पटक सोच्नु पर्ने हुन्छ । पछिल्लो समय चलचित्रले अलग धार समातेको भनिएता पनि परम्परागत शैलीका चलचित्र झैं यी सिनेमाहरु पनि फर्मुलामा सिमित हुन थाले । पछिल्लो पुस्तामा ढिसुम-ढिसुम् चल्थ्यो भने अहिलेको समयमा सस्ता हाँसो । यस्तो दृश्य प्रदुषणले गर्दा, चलचित्रको स्तर हाम्रो समाजमा माथि उठ्न सकेको छैन ।
‘आर्ट हाउस सिनेमा’का नाममा केही अर्थ न बर्थका चलचित्रहरु पनि आउने गर्छन्, बेला-बेलामा । अनि सिमित सिनेफिल दर्शकहरु आशा बोकेर हलसम्म पुगेका हुन्छन । अनि मैले भर्खर उल्लेख गरेका जस्ता चलचित्रमा ठोक्किन पुग्छन । अनि त्यसपछि सो कल्ड आर्ट हाउसका सिनेमा हेर्न पनि दर्शकहरु नजाने कति पटक सोच्ने गर्छन् । अन्तमा यो साइकलमा वास्तव मै अलग धारमा बन्ने चलचित्रलाई ठुलै मर्का पर्न जान्छ ।
कारण ? प्रदुषणमा रमाउनेहरु कुवाका भ्यागुता जसरी आफ्नो टेस्ट बदल्न चाहन्नन् । अनि ती प्रयोगात्मक चलचित्रको निकै थोरै दर्शकहरु अघिल्लो गल्ती दोहोरिएला भन्ने दोधारमा जाउँ-नजाउँ गर्दा-गर्दै मिती खुस्की सक्छ । अनि, ‘बुलबुल’ जस्तो चलचित्रहरुले हलमा सिमित शो मात्र पाउन बाध्य हुन्छन ।
‘बुलबुल’ एक स्तरीय चलचित्र मात्र नभई एउटा मौलिक कथा बोकेको नेपाली चलचित्र हो । केही हद सम्म कमर्सियल अडियन्सलाई निशाना गरिएको भएपनि यो एउटा अब्बल ‘आर्ट हाउस सिनेमा’ हो । उठान गरिएको बिषयवस्तु, प्रस्तुती लगायत सबैकुरामा राम्रो मेहेनत झल्किन्छ । अनि थुप्रै नेपाली चलचित्रहरुमा गरिने लापरवाहीलाई यो चलचित्रले भने सम्बोधन गरेको पाईन्छ । कुनैपनि शट हावादारी र कथा भन्दा बाहिर गएको देखिन्न । पात्रहरुले आफ्नो क्यारेक्टरबाट बाहिर गएको भेटिन्न । पार्श्व संगीतको राम्रो प्रयोग गरिएको छ भने तह-तहका बिम्बहरुको सुन्दर ढंगले प्रयोग गरिएको भेटिन्छ ।
‘बुलबुल’ चलचित्रको सबै भन्दा मन परेको पाटो, पात्र निर्माण र विकास हो । बिम्व, अलङकार र प्रस्तुतिमा पाइने मौलिकताले चलचित्रलाई बलियो त बनाएको छ नै । ए ! अर्को कुरा, कतिपय आर्ट हाउस सिकारु चलचित्रमा, बिम्वको ब्यापार जसरी कथाबस्तुलाई नै अल्छिलाग्दो तरिकाले सबटेक्स्ट लादेको पाईन्छ । तर, यो चलचित्रमा तह छ । बिम्वको प्रयोग गर्ने क्रममा त्यो खाले लापर्वाही गरिएको छैन ।
छायांकन, पार्श्व ध्वनी, कथाबस्तु प्रतिको न्याय र मौलिकताले बुलबुललाई नेपालमा बनिने थोरै उत्कृष्ट चलचित्रहरु मध्ये एक बनाएको छ । कमर्सियल सिनेमा सधैं सस्तो फर्मुलामा नै बन्नु पर्छ भन्ने बिचारधारा बोकेका चलचित्रप्रेमी वा अनुयायीहरुका लागि ‘बुलबुल’ एक स्वादिलो झापड जसरी प्रस्तुत भएको छ । एउटा सामान्य र सुनिआएको कथावस्तुलाई पनि एउटा फरक ढंगले प्रस्तुत गर्दा कुन उचाइसम्म पुर्याउन सकिन्छ भन्ने उदाहरण बन्न सफल भएको छ, ‘बुलबुल’ ।
