१८ असोज, काठमाडौँ – विश्व ट्रेड युनियन महासङ्घ (डब्लुएफटियु) को ७३आँै स्थापना दिवसका अवसरमा आयोजित ‘सबैका लागि सामाजिक सुरक्षा र निःशुल्क स्वास्थ्य उपचार’ विषयक गोष्ठीमा नेपाल कम्युनिष्ट पार्टी (नेकपा) का नेता झलनाथ खनालले तल्लो तहसम्म एकीकरणको प्रक्रियालाई टुङ्गोमा पुर्याउन नेतृत्वले प्राथमिकताका साथ लाग्नुपर्ने बताएका छन् ।
संविधान बमोजिम जनताको हक अधिकारलाई प्रत्याभूत गर्न धेरै ऐन कानून निर्माण गर्नु जरुरी रहेको बताउँदै उनले मजदुर सम्बन्धी ऐन परिस्कृत रुपमा निर्माण गरेर सबै श्रमिकलाई हक अधिकारले सुसज्जित बनाउनुपर्ने आवश्यकता औँल्याएका छन् ।
पूर्व प्रधानमन्त्री समेत रहेक नेता खनालले चाँडोभन्दा चाँडो एकीकृत पार्टी निर्माण गरेर त्यसलाई गति दिनुको विकल्प छैन बताएका छन् । विश्व ट्रेड युनियन महासङ्घ समन्वय समिति नेपालका संयोजक प्रेमलकुमार खनालले बढ्दो महङ्गी र आधारभूत आवश्यकताका वस्तु र सेवामा भइरहेको अधिक मुनाफामुखी प्रवृत्तिका कारण सरकारले तोकेको न्यूनतम पारिश्रमिकबाट श्रमिकको जीवनस्तर माथि उठ्न नसक्ने बताएका छन् । दोस्रो विश्वयुद्धको अन्त्यपछि संसारभरका श्रमिक पुनःसङ्गठित हुने क्रममा ५६ देशका ३४६ श्रमिक प्रतिनिधि भेला भएर अक्टोबर ३, १९४५ का दिन फ्रान्सको राजधानी पेरिसमा महासङ्घको स्थापना भएको हो । नेपालमा क्रियाशील प्रगतिशीत एवं समाजवादी विचार पक्षधर आठ ट्रेड युनियन महासङ्घ यस महासङ्घमा आबद्ध छन् ।
