खाने मुखलाई जुँगाले छेक्दैन भनेझैं अन्तरमनमा यदि उत्कट इच्छाशक्ति र आत्मबल छ भने जस्तोसुकै महान कदम चाल्न पनि उमेरले कदापि नछेक्दो रहेछ । चाहे त्यो कदम सुरुवातमा जति नै असहज किन नदेखियोस्, तर व्यक्तिको विशाल आत्मबलका सामु ती अप्ठ्याराहरुले आखिरमा एकदिन घुडा नटेकी सुखै नहुने रैछ ।
यस्तै महान सत्यलाई चरितार्थ गरेर देखाइदिएका छन्, काठमाडौँ जोरपाटीका वृद्ध-बृद्धाहरुले । आफ्ना पुराना सुन्दर दिनहरू सम्झिदै दुखसुख साटासाट गर्नुपर्ने बुढेसकालको यो उमेरमा पनि उनीहरूले मार्सल आर्ट सिकेर सबैलाई चकित तुल्याइदिएका छन् ।
उनीहरूको त्यो सुन्दर अभियानलाई साकार पारिदिएको छ, ‘बिहानी सोसल भेन्चर’को टिमले । बिहानी सोसल भेन्चरले ६० वर्ष माथिका बृद्धबृद्धाहरुलाई विभिन्न सहयोग गर्दै आएको छ ।
राष्ट्रिय नेपानको सहकार्य तथा बिहानी सोसल भेन्चरको अग्रसरतामा करिब २५ जनाको सङ्ख्यामा रहेका उनीहरूलाई जोरपाटीकै चमुण्डा मन्दिरमा थाइचीको प्रशिक्षण दिइरहेको छ । बिहानीकै थाइची प्रशिक्षक तथा राष्ट्रिय उसु मेडालिस्टद्वय सुस्मृती बोम्जन तामाङ र सन्ध्या महर्जनले प्रशिक्षण दिइरहेका छन् । प्रशिक्षकद्वय नेपाल उसु एसोसेसन र योङ्ग ड्रागन टिममा पनि आबद्द छन् ।
थाइचीको अभ्यासबाट बुढेसकालमा देखापर्ने हाडजोर्नी एवं ढाड दुख्ने समस्याबाट राहत पाउन सकिने सन्ध्या महर्जनले सल्लेरी खबरलाई बताइन । उनका अनुसार यसले वृद्ध-बृद्धाहरुमा आफ्नो सुस्वास्थ्य तथा निरोगीताको अग्रसरता आफैले गर्नमा समेत टेवा पुर्याएको छ । साथै, विभिन्न शारीरिक एवम् मानसिक असहजताहरुको उन्मुक्तिका निम्ति पनि आधुनिक समयमा थाइचीको महत्त्व बढ्दै गैरहेको सुस्मृती तामाङले बताइन ।
समग्रमा उनीहरूको यस किसिमको बृहत् अग्रसरताले “हार नमान, किनकि सुरुवात अक्सर गाह्रै हुन्छ !” भन्ने श्लोकलाई प्रश्रय दिएको छ ।
