लामो समयदेखि छाडा चौपायाको समस्या झेल्दै आएका कञ्चनपुरको शुक्लाफाँटा नगरपालिकाका बासिन्दाले नगरपालिका कार्यालय बाहिर पर्खालको ढोकाको ताला तोडेर बुधबार साँझ पशुचौपायालाई थुनेका छन् ।
चौपाया नगरपालिका कार्यालयभित्र छिराउने क्रममा प्रहरीले रोक्ने प्रयास गरे पनि रोक्न सकेनन् । सयौँको सङ्ख्यामा रहेका स्थानीय बासिन्दा र ठूलो सङ्ख्यामा रहेका चौपायाका कारण पूर्व–पश्चिम राजमार्ग एक घण्टा जाम हुँदा यात्रुले सास्ती खेप्नुपरेको थियो ।
छाडा चौपायालाई अस्थायीरूपमा व्यवस्थापन गर्न नगरपालिकाले वडा नं ८ को गिठेमा लैजाने निर्णय गरेको प्रमुख प्रशासकीय अधिकृत रघुनाथ अवस्थीले आक्रोशित सहभागीलाई बताएपछि उनीहरूले चौपायालाई नगरपालिकामै थुनेर फर्किएका थिए ।
छाडा चौपायाको दीर्घकालीन समाधानका लागि नगरप्रमुखको संयोजकत्वमा ११ सदस्यीय समिति गठन गरिएको जानकारी दिँदै उहाँले भन्नुभयो, “वन तथा वातावरणलाई प्रतिकूल असर नपर्ने गरी सम्बन्धित सामुदायिक वन र वन कार्यालयसँग समन्वय गरी दिगोरूपमा चौपायको व्यवस्थापन गर्ने निर्णयसमेत गरिएको छ”
रासस
