मन्त्रिपरिषदको बैठकमा सचिवले असहयोग गरेको भन्दै शहरी विकासमन्त्री दिलनाथ गिरीले आफ्नो मन्त्रालयको सचिव परिवर्तन गर्ने प्रस्ताव गरेपछि मन्त्रिपरिषदको बैठकमा हंगामा भएको छ ।
बैठकमा मन्त्री गिरीले शहरी विकास मन्त्रालयका सचिव दीपेन्द्रनाथ शर्माले आफूलाई पूरै असहयोग गरेको भन्दै असन्तुष्टिसहित सचिव परिवर्तन गर्नुपर्ने प्रस्ताव राखेपछि उपप्रधान एवं उर्जामन्त्री कमल थापाले आपत्ति जनाएका छन् ।
मन्त्रि गिरीले अडानका साथ सचिवले जनताको काम गर्नुको सट्टा होटलहोटलमा ठेकेदारसँग मिलेर ठेक्कापट्टा मिलाउन लागेको भन्दै थप आक्रोशित भएपछि दुई मन्त्रीबीचको बिबादले उग्र रुप लिएको एक मन्त्रीले बताएको खबर आजको नेपाल समाचारपत्रमा छापिएको छ ।
ती मन्त्रीका अनुसार, सचिवको बिषयले बैठकमा निकै ठूलो रुप लियो, प्रधानमन्त्रीलाई समेत सम्हाल्न गाह्रो भयो । ‘थापाको भनाइ उद्धृत गर्दै एक मन्त्रीले भने, शहरी विकास मन्त्रालयका सचिव परिवर्तन हुँदैन, काम गर्न नसक्ने हो भने राजीनामा गर्नु हो, म अहिले नै स्वीकृत गरिदिन्छु ।’
नयाँ पत्रिकामा पनि यो खबर छापिएको छ:
सचिवहरु र मुख्यसचिवहरुविरुद्ध मन्त्रीहरु आक्रोशित भएका छन् । बैठकमा उपप्रधानमन्त्री विजय कुमार गच्छदारसहित आधा दर्जन मन्त्रीले निर्वाचनपछि सचिवहरुले टेर्न छोडेको र यसमा मुख्य सचिवकै भूमिका रहेको आरोप लगाएका थिए । २० मिनेट चर्काचर्की भएको थियो ।
