स्पेनिस ला लिगा फुटबल अन्तर्गत शनिबार भएको खेलमा बार्सिलोनाले रियल मड्रिडलाई ३–० ले हराएको छ । 
रियल मड्रिडको घरेलु मैदानमा भएको एल क्लासिको खेलमा पहिलो हाफ बराबरीमा रोकिएको थियो । तर दोस्रो हाफको ५४ औं मिनेटमा बार्सिलोनाका लागि लुइस स्वारेजले गोल गर्दै १–० को अग्रता दिलाएका थिए । 
त्यस्तै खेलको ६४ औं मिनेटमा रियल मडिड्रका डिफेन्डर ड्यानी कारबाहालले हातले बल रोकेपछि पाएको पेनाल्टीलाई लियोनल मेसीले गोलमा परिणत गरेका थिए । यो गोलसँगै मेसीले एल क्लासिको खेलमा आफ्नो गोल संख्या २५ पुर्याएका छन् ।
खेलको ४० औँ मिनेटमा बार्सिलोनका खेलाडी पाउलिन्होले उत्कृष्ट हेड गर्दै बललाई पोस्टमा प्रहार गरे पनि रियल मड्रिडका गोलरक्षक नाभासले उत्कृष्ट बचाउ गरेका थिए । त्यस्तै रियल मड्रिडका करिम बेन्जेमाले पहिलो हाफको ४२ औं मिनेटमा प्रहार बार्सिलोनको पोस्ट नजिकबाटै बाहिरिएको थियो । 
शनिबारको जितसँगै बार्सिलोना ४५ अंकसहित शीर्ष स्थानमा रहँदै लालिगा उपाधि होडमा सहज स्थितिमा देखिएको छ । चौथो स्थानमा रहेको रियल मड्रिडको भने ३१ अंक रहेको छ ।
