८ असार, रसुवा – उत्तरमा छिमेकी देश चीनसँग जोडिएको जिल्ला भएर पनि रसुवा हालसम्म कोरोनामुक्त छ । चीनको वुहान शहरमा कोरोना फैलेपछि जिल्ला प्रशासन कार्यालयले शुरुमै सीमा नाका रसुवागढी बन्द गरेको थियो । सुरक्षित रहन सरकारले दिएको मार्गनिर्देशन एवं स्थानीय बासिन्दाको पूर्वसावधानीका कारण हालसम्म रसुवा सुरक्षित छ ।
चीनको हुवेइ प्रान्तको वुहान शहरमा उक्त रोगको संक्रमण फैलिन थालेलगत्तै नेपालको उत्तरी नाका रसुवाबाट आवतजावतमा रोक, रसुवागढी तथा बेत्रावतीमा हेल्थ डेस्क स्थापना, रोगको असरसम्बन्धी व्यापक जनचेतना, स्थानीय बासिन्दाद्वारा लकडाउनको पूर्ण पालना जस्ता कार्यले हालसम्म कोरोना रोग नियन्त्रण गर्न सफलता मिलेको जनस्वास्थ्य प्रमुख किरण श्रेष्ठले जानकारी दिए ।
जिल्ला बाहिर र विदेशबाट आएका स्थानीय नागरिकलाई पहिलो चरणमै क्वारेन्टिनमा राखी स्वास्थ्य परीक्षण गराउने, खाद्यान्नलगायत अत्यावश्यक दैनिक उपभोग्यवस्तु बोकेर जिल्ला प्रवेश गर्ने सवारी साधनमा कीटाणुनाशक औषधि छर्कने जस्ता कामले रसुवा कोरोनाबाट सुरक्षित रहेको चिकित्सकले बताएका छन् ।
विदेशबाट आउने स्थानीय नागरिकको संख्या कम रहेको, कुन व्यक्ति कहाँबाट आयो, कहाँकहाँ गयो, कुन कुन मानिससँग भेटघाट भयो भनी निगरानी सक्रियतापूर्वक जनस्तरबाट निरन्तर भइरहेकाले उपचार तथा परीक्षण अत्यन्तै सजिलो भएको जिल्ला अस्पतालका मेडिकल सुपरिटेन्डेन्ट डा अनिलकुमार खरेलले जानकारी दिए ।
केन्द्र तथा प्रदेश सरकारको निर्देशन एवं जिल्ला विपद् व्यवस्थापन समितिको निर्णयलाई गाउँपालिकाहरूले अत्यन्तै सक्रिय रूपमा कार्यान्वयन गरिरहेको, राजनीतक दल, जनप्रतिनिधि, सुरक्षा निकाय, रेडक्रसलगायत सामाजिक संघसंस्थासमेतका निकायले राम्रो सहयोगी भूमिका निर्वाह गरिरहेकाले हालसम्म कोभिड –१९ नियन्त्रणमा सहजता आएको प्रमुख जिल्ला अधिकारी हरिप्रसाद पन्तले बताए ।
रसुवागढी नाकाबाट समयमै मानिस तथा सवारी साधन आवतजावतमा रोक लगाई सीमा तथा बेत्रावतीमा हेल्थ डेस्क स्थापना गर्नु नै रोग नियन्त्रणको ठूलो उपलब्धि भएको प्रजिअ पन्तले बताए । उनका अनुसार हालसम्म ५१२ जनाको आरडिटी र २९ जनाको स्वाव परीक्षण गरिएको, परीक्षणका लागि थप ४९ जनाको स्वाव संकलन भइसकेको र हाल ४२ जना क्वारेन्टिनमा छन् ।
