६ वैशाख, काठमाडौं । आज विश्व सम्पदा दिवस । प्रत्येक वर्षको अप्रिल १८ मा यो दिवस मनाउने गरिन्छ । विश्व सम्पदा दिवस सन् १९८२ देखि मनाउन सुरु गरिएको हो । दिवसको अवसरमा सम्पदाहरूको संरक्षणलाई लिएर विभिन्न कार्यक्रम, गोष्ठीहरू गर्ने गरिन्छ ।
तर यसपालि भने कोरोना भाइरसको महामारीले गर्दा विश्व सम्पदा दिवसको दिन कुनै पनि कार्यक्रम राखिएको छैन ।
कोरोना भाइरसको कारणले गर्दा सम्पदा क्षेत्रमा असर परेको छ । नेपालका महत्त्वपूर्ण सम्पदा क्षेत्र खाली छन् । सरकारले सन् २०२० मा २० लाख पर्यटक भित्राउनको लागि गरेको तयारी ‘भिजिट नेपाल २०२०’ कोरोनाको कारणले गर्दा रद्द गरिएको छ । कोरोनाले नै गर्दा अन्तर्राष्ट्रिय उडान बन्द गरिएको छ ।
लकडाउनले गर्दा जनताहरू घरमा नै कैद भएका छन् । पर्यटन क्षेत्रमा यसले नराम्रोसँग असर गरेको छ । २० लाख पर्यटक भित्राउने योजनाले साकार रूप पाएन । वि.सं. २०७२ मा गएको विनाशकारी भूकम्पबाट क्षति पुगेका सम्पदाहरूको मर्मत अझै पनि हुन सकेको छैन । धरहरा, रानीपोखरी, काष्ठमण्डपजस्ता महत्त्वपूर्ण सम्पदाहरू अझै साकार रूप पाएका छन् ।
काठमाण्डौं उपत्यकाभित्रका काठमाण्डौं, ललितपुर र भक्तपुरका ७ सम्पदा विश्व सम्पदा सूचीमा सूचीकृत रहेका छन् । संयुक्त राष्ट्र सङ्घीय शैक्षिक, वैज्ञानिक र सांस्कृतिक संगठन युनेस्कोले काठमाण्डौं उपत्यका र लुम्बिनी क्षेत्रलाई सांस्कृतिक सम्पदा क्षेत्रका रूपमा राखेको छ । सन् १९७९ मा पाटन दरबार क्षेत्र, पशुपतिनाथ मन्दिर, वसन्तपुर दरबार क्षेत्र, भक्तपुर दरबार क्षेत्र, बौद्धनाथ स्तुपा, चाँगुनारायण मन्दिर र स्वयम्भूनाथ विश्व सम्पदा सूचिमा राखिएका थिए । विश्व सम्पदा सूचिमा सगरमाथा राष्ट्रिय निकुञ्ज र चितवन राष्ट्रिय निकुञ्ज पनि रहेका छन् ।
सल्लेरी खबरका फोटो पत्रकार शंकर भुजेलले कैद गरेका विश्व सम्पदामा सूचीकृत नेपालका सम्पदा
भुजेल सल्लेरी खबरका फोटो पत्रकार हुन् ।