५ पुस, काठमाडाैँ – सूर्यविनायक नगरपालिका–८ अन्तर्गत जगाते डोलेश्वर सडक खण्डमा पर्ने चख्खु खोलामा निर्माण सम्पन्न पुलको आज सांसद महेश बस्नेतले उद्घाटन गरेका छन् ।
उनले भक्तपुरमा निर्माणको प्रक्रियामा रहेको अन्तर्राष्ट्रियस्तरको रङ्गशाला, कभर्ड हललगायतका गौरवका आयोजना निर्माण गरेर विकास विरोधीको आवाज बन्द गर्ने बताए । जिल्लामा अहिले १०० भन्दा बढी सडक निर्माण भइरहेको जानकारी दिँदै उनले इतिहासमै पहिलो पटक एउटै आर्थिक वर्षमा १८ पुल बन्ने बताए । उनले चालु वर्षमा मात्रै छ ठूला र सात साना गरी १३ पुल बन्ने कार्य शुरु भइसकेको भनाइ राखे ।
कार्यक्रममा नगर प्रमुख वासुदेव थापाले नगरपालिकामा नमूनाका रुपमा विकास कार्य अगाडि बढेको बताए । त्यस अवसरमा वडा नं ८ का अध्यक्ष किरण थापाले कूल रु एक करोड ५६ लाखको लागतमा निर्माण सम्पन्न गरिएको उक्त पुलमा स्थानीयवासीको करिब रु २२ लाखको अनुदान तथा रु एक लाख ५६ हजार नगद सहयोग रहेको जानकारी दिए ।
