५ साउन, मकवानपुर । मकवानपुरको मनहरी गाउँपालिका-९ रजैयास्थित राप्तीखोला बगरमा प्रहरी र गाँजा तस्करबीच गोली हानाहान भएको छ ।
शनिबार राति गाँजा बोकेको ५ जनाको समूह र प्रहरीबीच गोली हानाहान भएको हो । विशेष सूचनाको आधारमा खटिएको प्रहरीले तस्करको समूहलाई पक्राउ गर्न खोज्दा उक्त समूहले प्रहरीमाथि गोली प्रहार गरेको र त्यसपछि प्रहरीले पनि जवाफी फायरिङ गरेको प्रहरी महानिरीक्षकको सचिवालयका एसपी रमेश थापाले जानकारी दिएका छन् ।
प्रहरी टोलीले तस्करमा संलग्न ५ मध्ये १ जना कुमार स्याङतानलाई पक्राउ गरेको र उनको साथ बाट एउटा पेस्तोल, पाँच राउण्ड गोली र ३५ किलो गाँजा बरामद गरेको जनाएको छ ।
घटनास्थलबाट अन्य चारजना फरार व्यक्तिहरुको खोजी भइरहेको र घटनाबारे थप जानकारी दिन प्रहरीले आज दिउँसो पत्रकार सम्मेलन गर्ने भएको छ ।
