४ कार्तिक, काठमाडाैँ । विभिन्न देशका सांसदहरुको अन्तर्राष्ट्रिय सञ्जालको बोर्ड सदस्यमा नेपालका सांसद गगनकुमार थापा निर्वाचित भएका छन् ।
विश्व बैंक र अन्तर्राष्ट्रिय मुद्राकोषसम्बन्धी अन्तर्राष्ट्रिय सञ्जालको बोर्ड सदस्यमा उनि सन् २०२१ देखि २०२३ का लागि निर्वाचित भएका छन् । बोर्ड सदस्यका रुपमा उनले विश्वका १४० भन्दाबढी देशका सांसदसँगै समावेशी विकासका लागि काम गर्ने छन् ।
उनले यस अवसरलाई आफूले सिक्ने, सम्बन्ध विस्तार गर्ने र सक्दो योगदान गर्ने मौकाका रुपमा उपयोग गर्ने बताएका छन् ।
उनले सांसदहरुको अन्तर्राष्ट्रिय सञ्जालको अग्रपङ्क्तिका लागि आफू निर्वाचित भएको खबरले उत्साहित बनाएको उल्लेख गरेका छन् । नेपाली कांग्रेसबाट उम्मेदवार भई काठमाडौँको क्षेत्र नं ४ बाट उनि प्रतिनिधिसभा सदस्यमा निर्वाचित भएका हुन् ।
थापा प्रतिनिधिसभाका लागि तेस्रो पटक सांसद छन् । पहिलो पटक समानुपातिक प्रणालीमार्फत निर्वाचित हुनुभएका उनि बाँकी दुई पटक भने प्रत्यक्ष निर्वाचित भएका छन् ।
