Logo

हेलिकप्टरमा उड्दा उड्दै खुस्कियो २ जना मन्त्रीको पद



८ असार, काठमाडाैँ । सर्वोच्च अदालतले प्रतिनिधिसभा विघटनपछि विस्तार गरिएको मन्त्रिपरषद्लाई मान्यता नदिने अन्तरिम आदेश दिएको छ ।


प्रधानन्यायाधीश चोलेन्द्रशमशेर राणा र न्यायाधीश प्रकाशकुमार ढुंगानाको आजको संयुक्त इजलाशले प्रधानमन्त्री केपी शर्मा ओलीले प्रतिनिधिसभा विघटनपछि दुई पटक विस्तार गर्नुभएको मन्त्रिपरिषद्मा उपप्रधानमन्त्री, मन्त्री र राज्यमन्त्रीलाई मुद्धाको अन्तिम किनारा नलागेसम्म कामकाज गर्न रोक लगाउने आदेश दिएको हो । प्रधानमन्त्रीले गत जेठ ८ गते प्रतिनिधिसभा विघठनपछि गत जेठ २१ र २७ मा पुनः गठन गरी समाजवादी जनता पार्टीका ११ सहित २० मन्त्रीहरु नियुक्त गरेका थिए ।


‘‘नेपालको संविधानको धारा ७७ को उपधारा ९१० नियुक्त प्रतिनिधिसभा विघठनको दोस्रो अवस्थापछि ७७ को ९३० बमोजिम प्रधानमन्त्रीको पद रिक्त हुन आएकामा अर्को मन्त्रिपरिषद् गठन नभएसम्म सोही मन्त्रिपरिषद्ले कार्य सञ्चालन गर्नेछ ।’’ अदालतको आदेशमा भनिएको छ, ‘‘जे जुन अवस्थामा छ, त्यही मन्त्रिपरिषद्ले कार्यसञ्चालन हुनुपर्छ । विस्तार वा थप गर्नु संविधान अनुकूल भएको देखिएन ।’’


अधिवक्ता बालकृष्ण न्यौपाने र अधिवक्ता वीरेन्द्रप्रसाद साहले अलग अलगरुपमा राष्ट्रपतिको कार्यालयलाई विपक्षी बनाइ उक्त रिट दायर गरेका थिए ।

मंगलबार उपप्रधान तथा शहरी विकासमन्त्री राजेन्द्र महतो र स्वास्थ्यमन्त्री शेर बहादुर तामाङको भने हेलिकप्टरमा उड्दा उड्दै मन्त्रस् पद खुस्किएको छ । उनीहरू असार १ गतेको बाढी पहिरोले ध्वस्त बनाएको सिन्धुपाल्चोकको मेलम्बी अवलोकनका लागि गएका थिए । तर, उनीहरू काठमाडाैँ फर्किँदै गर्दा नै सर्वोच्च अदालतले प्रतिनिधिसभा विघटन भएपछि नियुक्त गरिएका मन्त्रीहरूलाई काम गर्न नदिनु भन्ने आदेश जारी गरेसँगै उनीहरू मन्त्री पद हेलिकप्टरमा उड्दा उड्दै खुस्किएको हो ।

प्रतिक्रिया दिनुहोस्