३० चैत, काठमाडाैँ । चीनको वुहानबाट सुरू भएको कोरोना भाइरस यतिबेला विश्वको २ सय १० देशमा फैलिसकेको छ । २ सय १० देशका १ लाख ८ हजारभन्दा बढीको मृत्यु कोरोनाले गर्दा भइसकेको छ ।
युरोप
एसियन मुलुक चीनबाट फैलिएको भए पनि यो भाइरसले सबैभन्दा क्षति युरोपमा गरेको छ । अहिलेसम्म युरोपमा मात्रै कोरोनाबाट ७३ हजार ६ सय २५ जनाले ज्यान गुमाएका छन् । त्यसै गरी युरोपमा अहिलेसम्म ८ लाख ५२ हजार ८ सय ९९ जना कोरोनाबाट संक्रमित भएका छन् ।
उत्तर अमेरीका
युरोपपछि कोरोनाबाट सबैभन्दा प्रभावित महादेश उत्तर अमेरीका रहेको छ । सो महादेशमा अहिलेसम्म २१ हजार ७ सय ९२ जनाले ज्यान गुमाउँदा ५ लाख ६८ हजार ९ सय ५१ जना कोरोना संक्रमित भएका छन् । उत्तर अमेरीकाको पनि अमेरीका सबैभन्दा नराम्रोसँग प्रभावित भएको छ । त्यहाँ अहिलेसम्म २० हजार भन्दा बढीको मृत्यु भइसकेको छ ।
एसिया
कोरोना भाइरसको उत्पत्ति नै एसियन मुलुक चीनबाट भएको हो । तर उत्तर अमेरिका र युरोपमा जति क्षति भने कोरोनाले एसियामा पुर्याएको छैन । अहिलेसम्म कोरोनाले एसियामा १० हजार ५ सय ९७ जनाको ज्यान लिएको छ भने २ लाख ८७ हजार २ सय ८३ जना कोरोना संक्रमित भएका छन् ।
दक्षिण अमेरीका
दक्षिण अमेरीकी मुलुकहरूमा कोरोना त्यति व्यापक रूपमा फैलिएको छैन । तर, यो महादेशमा अहिलेसम्म १ हजार ९ सय ४७ जनाले कोरोनाको कारण ज्यान गुमाइसकेका छन् । त्यसै गरी यहाँ ४८ हजार ६९ जना कोरोनाबाट संक्रमित भएका छन् ।
अफ्रिका
अफ्रिकामा कोरोनाको अवस्था अहिलेसम्म सामान्य नै रहेको छ । यो सामग्री तयार पार्दासम्म अफ्रिकामा ७ सय ४५ जनाको मृत्यु भएको छ भने १४ हजार २ सय २० जना कोरोनाबाट संक्रमित भएका छन् ।
ओसियनिया
ओसियनियाका जम्मा २ वटा देशका मानिसले मात्रै कोरोनाका कारणले ज्यान गुमाएका छन् । तर संक्रमित भने ६ वटै देशमा रहेका छन् । ओसियनियामा अस्ट्रेलियामा ५६ र न्यु जिल्याण्डमा ४ जना गर्दा जम्मा ६० जनाको मृत्यु भएको छ । ओसियनियामा अहिलेसम्म ७ हजार ७ सय २० जना कोरोना संक्रमित भेटिएका छन् ।
